好多香港人怕蝕本，唔夠膽做生意，惟有打死一世工；反觀美國境內嘅新移民，創業意欲就相當旺盛。《MSN討論區》嘅網民kmk1234話，調查發現，美國有25%新成立嘅高科技公司由新移民創辦，佢哋創造大量職位，對美國經濟有好大貢獻。
AveryinFI講：「其實早喺上世紀30年代『美國大蕭條』過後，各類商人已紛紛到美國開舖頭，追求『美國夢』。佢哋比𠵱家嘅新移民更加鍾意創業，令美國成為移民大國。」
JulioJiminez話：「嚟美國做生意嘅移民，多數都係印度等地嘅亞裔人，好少墨西哥人。其實計我話，美國應該畀多啲有技術嘅亞洲人移居過嚟，咁就可以創造多啲職位。」
EdLima認為，美國需要輸入高技術人才，反映該國未有為高等教育提供足夠嘅學費津貼同貸款，令當地唔少人未能完成高等教育；呢個情況好可悲，所以美國應該增加高科技教育方面嘅投資。

39%加州移民搞生意

根據美國杜克大學嘅調查顯示，由1995年至2005年嘅10年內，喺美國成立嘅2000多家高科技公司中，多達25%係由新移民創辦，佢哋主要來自台灣、印度、中國大陸等國家或地區，而且擔任行政總裁、科技總監，或研發主管等高層職位。其中喺加州，移民創業嘅比例就高達39%，並以華裔居多。
不過，everyman就唔滿意啲新移民搶飯碗，因為當地公司鍾意聘請廉價嘅新移民勞工，令到25%土生土長嘅美國工程師失業。