楊千嬅噚日帶住4歲囝囝丁進諾（Torres）現身中環置地附近，呢次母子出動，唔係濕平，而係孖咇賣旗。

千嬅係東華三院嘅星級榮譽大使，今次係幫東華三院籌款。早上11點幾，千嬅母子同黎芷珊，仲有東華前主席、何鴻燊的二房千金何超蕸同其他人先喺置地廣場內先大合照，跟住就出動到置地附近開始賣旗，當中以千嬅母子檔最受途人歡迎。

千嬅鼓勵Torres向途人賣旗，仲教佢要幫人搣旗同遞上錢袋收集善款，途人向千嬅買旗後，佢哋都必順帶提出「集郵」要求，千嬅都有求必應。只見Torres由怕醜變為主動，佢見媽咪被途中係咁集郵，Torres就在附近自己賣旗，醒目Torres更向外籍人士賣旗，非常大膽，大約賣咗45分鐘，由於天氣都好熱吓，Torres都賣到滿頭大汗。

母子賣旗行動完畢，佢哋都入番商場嘆冷氣抖一抖，千嬅話囝囝呢次係首次賣旗：「小朋友應該體驗一吓。」母子抖咗一陣就低調離開。