機會嚟喇，大家準備好未，今日特高娛樂制作有限公司喺fb專頁，正式公佈台灣天團五月天今年同港迷嘅「五月之約」，落實喺香港迪士尼幻想道露天場地，即旅遊巴士停車場舉行，日期將會喺5月4、5、6、11及12日 (五場)，共五場，預計可容納2萬人，除基本座位外，更設立企位區，五迷真係要好好準備，預備去撲飛喇！

五月天同香港歌迷嘅「五月之約」，今年1月，就有報道話五月天已取消咗今年5月喺紅館嘅booking，當時好多五迷真係晴天霹靂，好擔心五月天今年唔嚟香港演出，但後來亦有指五月天只係想改喺香港嘅戶外場地舉行演唱會，隨即就有五迷出post估計五月天會喺邊個地方舉行，但五迷就覺得香港根本有一個合適嘅戶外場地可以搞大型嘅音樂會，所以都好擔心呢(新聞連結： http://bit.ly/2mEF9V3 )

而五月天嘅紅館期，就俾梁詠琪冷手執個熱煎堆，令GiGi相隔7年後再喺紅館開騷，日前GiGi已經舉行記者會，宣佈演唱會詳情添(新聞連結： http://bit.ly/2oW54rC )。

至於五月天嘅戶外騷，其實早前已經有指佢哋正申請喺充滿夢幻嘅迪士尼舉行，但遲遲未有正式公佈，今日終於有消息喇，特高娛樂制作有限公司今日喺fb專頁正式公佈五月天演唱會詳情，將於5月4、5、6、11及12日 於迪士尼嘅幻想道露天場地舉行，票價共分四種，分別係$1,180、$880、$680及$480，其中$680為企位。五迷終於可以安心，目前佢哋最需要做嘅就係部署點樣同啲黃牛黨爭飛。

精選娛聞，喺晒《娛果》
http://fb.com/appledailyent