如果你相信人生是不斷挑戰的過程，你會理解為何熊黛林（Lynn）明明可選擇在家養尊處優，偏偏要在大熱天時搬着貨品進出工廈，再拋身感受不停開會的折磨和領教商場的險惡。

「挑戰性高？梗係做生意啦！因為件事仲係籌備階段，唔知之後會點，個挑戰先至最大。」Lynn和丈夫郭可頌創立的自家運動品牌Devi，在內地網站開售在即，這天接受《蘋果》訪問之時，仍仔細驗貨，確保沒有瑕疵。一個「百億人妻」，為「挑戰」兩個字豁了出去，確實有點超現實。

Lynn自言不適合做生意，卻貿貿然下了這個痛苦決定，全因一個「靚」字：「有日我同老公講，成日做運動着嚟着去都係嗰幾件，好悶。隔咗幾日，老公突然同我講，既然唔鍾意出面啲衫，不如自己做一個品牌，叫設計師幫你設計。」

腦海「叮」一聲，卻令Lynn踏進近兩年的痛苦旅程，由搵設計師、搵廠、搵職員，到開會、驗貨，無一不親力親為，最慘痛的，莫過於要領教商場險惡。「因為我未做過生意，唔知道一個廠係點樣運作，你講咗幾時要驗貨，佢哋話得得得冇問題。到咗嗰陣時呢，搵唔到人呀！跟住啲貨又遲咗好多日，到送過嚟之後，貨不對辦嘅，啲料又差。原來，真係會有人咁樣呃你嘅！」

萬事起頭難，Lynn完全親身體驗，尤其要跟設計師不停開會，當中承受的壓力，比拍戲、行catwalk還要大。「請真我真係時時刻刻都想放棄，太辛苦啦，真係成日喺度喊！」眼見愛妻承受痛苦，郭可頌當然心痛，但也不能表露出來，Lynn解釋：「老公話做生意係咁㗎，哈哈！我明佢嘅意思，佢唔可以一味話哎呀你好辛苦，佢咁樣我就越冇鬥志。」

「Devi」是印度文，解作女神，問到選用名字的因由，Lynn甜笑說：「點解叫女神呢？我老公話，你咪我嘅女神囉！」原來，Lynn下海從商，不只「挑戰」咁簡單。

採訪：馮國康、RachelBee
攝影：仇志德
攝錄：Neo
化妝：Ig:zoefan
髮型：Chris of ILcolpo Platinum