衞生署經各界三催三請，連番施壓，卒之以慢一百拍嘅速度，公佈全港各區受「沙士」傳染嘅大廈名稱。以前衞生署頂住唔發佈呢啲資料，提出幾種冇邏輯兼侮辱市民智慧嘅理由，實在令人激氣，不過都好，遲到好過冇到，費事再鬧佢咯。
話說香港人性喜周街走，被逼軟禁在家，唔敢出外消費，幾近忍無可忍。上星期日睇報紙，知道港島南區一單沙士都冇，最為衞生乾淨，加上天朗氣清，氣溫二十六度以上，於是個個一躍而起，湧往南區呼吸新鮮空氣。

建築邦等一班朋友中午到福臨門飲茶，跟住揸車去淺水灣，唉吔，香島道塞車，去深水灣淺水灣赤柱嘅車直情係bumpertobumper，香港人大舉侵略南區，建築邦冇法子搵到車位泊車，一路駛到去赤柱，又行番轉頭，想話去淺水灣酒店舊址飲下午茶，停車場爆滿，入唔到去，卒之駛咗去紅山半島，搵個位停低，一家人走出去，呼吸新鮮空氣，發覺呢度啲空氣係甜啲、香啲，陽光都溫暖啲，唔怪得南區冇「沙士」！
建築邦家居新界，本來空氣都唔錯，但該區俾沙士侵襲，當堂冇咁馨香。𠵱家搬去南區好唔好呀？建築邦話：「發夢咩，我哋呢行好唔穩陣，又孭住一層負資產，邊有能力高攀！」住響南區就威咯，賣樓都可以嗌高五巴仙！不過，千祈唔好有位劉教授來港治病，住響南區呀，否則香港再無樂土。