以前講靚胎，第一個反應一定以為係講跑車胎，不過老實講，香港地真係玩跑車嘅人又有幾多，房車先至係主流。你諗到，輪胎公司梗知道。日本Bridgestone就係睇準呢點，除高性能跑車胎外，研發房車及MPV專用嘅輪胎，其實早年Bridgestone已經有一款針對房車生產嘅GR-80，標榜寧靜度及出色嘅抓地力。今次呢款GR-90可以話係佢嘅升級版，除咗保留呢兩個功能外，胎面更首度用上幾組不同胎紋嘅設計。內側直紋進一步加強抑噪效果，細小條紋則用以提高排水效能；外側較大嘅方塊花紋更有利高速入彎時嘅貼地性及穩定性。而兩旁胎壁亦相應加強硬度，確保直線行車時嘅高度穩定性，即使路面凹凸不平都可以從容行走。

新膠質物料更黏地

作為車版記者，試車之餘當然都有職責試埋車胎，而且仲要係長測。揸住裝咗GR-90車胎嘅車玩咗成個禮拜，經歷晴天、雨天兼陰天，實行試到盡。車胎質素喺濕地最能發揮表現，何況呢款仲係標榜全天候。結果GR-90真係無令人失望，喺濕滑路面嘅表現相當突出。可能與使用新款膠質物料有關，駕駛時感覺特別黏地，在濕地高速轉向時，穩定性甚至媲美高性能跑車，驚喜。至於靜音效果，可能GR-80已做得相當出色，在一般日本中型房車身上，效果不太明顯。GR-90輪胎現時提供14"至19"尺碼供車主選擇，可向各代理車房查詢。

記者：趙慧敏