好可惜,特區政府一如過去面對毋忘六四事件、平反八九民運嘅議案時一樣,拒絕派出官員答辯。唔少泛民中人都話係意料之內,事關連特區最高領導人煲呔都話對劉曉波事件不予置評,試問佢啲o靚又點敢貿貿然回應?其實唔單止特區政府,泛民中人相信以民建聯為首嘅建制派當日都會變鵪鶉,唔會開腔發言,可能只得泛民主派唱獨腳戲。
公民黨趁辯論前夕,今晚7點15分喺立法會外舉行燭光集會聲援劉曉波;除咗公民黨領導核心,民主黨、社民連同支聯會成員以及記者協會主席麥燕庭都會出席,公民黨呼籲市民積極參與,藉着點點燭光向在囚異見人士送上支持。