韓國女團少女時代嘅前成員Jessica，自從前年退團、去年正式同所屬嘅SM事務所結束合約後、專注個人品牌事業發展，不過佢冇忘記幕前演出，除了有參與內地綜藝節目外，亦有籌備新專輯，早前傳佢將會重返韓國綜藝節目，擔任美容節目嘅主持。

而自從Jessica同SM結束合約後，唔少經理人都向呢位前少時成員招手，今日Jessica終於決定簽賣身契畀邊個，並宣佈簽約給Coridel娛樂，宣告即將喺韓國國內展開個人活動。

今次Jessica決定簽畀呢間公司，原來想肥水不流別人田，事關Coridel娛樂係Coridel集團新成立嘅一間娛樂公司，而Coridel集團嘅CEO就正正係Jessica嘅男友K先生（權寧一），擺明情侶檔拍住做，Jessica以行動力撐男友。據知Coridel集團喺去年收購咗CLEARCOMPANY，日後仲會繼續簽約其他藝人，擴大事業範圍。

Coridel娛樂相關負責人話：「目前，我哋已建立咗同唔少海外市場相關嘅合作關係，並接手咗相關業務，今後將成為喺全球市場具有影響力嘅娛樂公司。除咗Jessica今後嘅個人演藝活動，我哋亦將全力支持佢個人時尚事業。今後，我哋亦會陸續簽約其他大牌明星，請大家多多關注。」