【深入村落】
春回大地，宮粉洋蹄甲怒放、緋紅簕杜鵑爭妍、木棉花紅似火，吸引不少巿民近日騎單車遊走進鄉郊、引水道等，一邊hea騎單車，一邊賞花及拍照。
單車發燒友梁先生夫婦日前聯同朋友一行多人，在落馬洲一帶村落騎車，豈料踩入了花叢；梁先生表示，一邊騎單車，一邊有驚喜，只見路邊有一排排宮粉洋蹄甲怒放，情景十分壯觀，「引到男女車友個個停晒車，猛咁影相」。

兩公里簕杜鵑壯觀

騎單車好處能夠深入村落，他說，一眾車友騎至河塘，又見另一番花色，只見池塘種滿了簕杜鵑，在翠綠塘水、田野映襯下，朵朵鮮花朵朵紅，吸引力不輸於宮粉洋蹄甲，「騎住單車賞花，可以好快睇到唔同地點花海」。
梁先生教路說，另一騎單車熱點錦上路西鐵站附近，種植滿木棉樹，天氣暖和木棉花開，另有景致，「去東涌翔東路至映灣園一帶，有好多人騎單車，嗰邊簕杜鵑有成兩公里咁長，都壯觀好靚」。
家住荃灣的Angel每逢假日也在區內騎單車，近日騎至荃灣引水道一帶發現宮粉洋蹄甲盛開。她說，大欖水塘越野單車徑亦可以欣賞宮粉洋蹄甲，「望住啲花海嚟踩單車，真係賞心悅目，踩上斜路，對腳都夠力啲」。
《蘋果》記者