連續兩天有機會喺屋企睇到英冠直播,呢個亦係我畀多幾十蚊,訂埋無記收費台嘅原動力,唔係為咗《志雲飯局》。好奇怪自己近期周中英冠準得多,昆士柏主場開齋贏波,助我喺「休漁期」過吓擂台「1哥」癮;有時要贏錢最緊要策略用得好,每個禮拜執番一千幾百食餐飯不知幾爽,亂發子彈嘅精神,我唔制。
睇番禮拜日、一輸波嘅錫菲聯同諾域治,我就慨嘆英超全面國際化後,不少紅極一時嘅英格蘭球員燉咗落極體力化嘅英冠打滾,踢到苦口苦面。「黑面神」細笠教嘅錫菲聯有東治、軒祖、比亞堤同史廸,但隊波全無組織,𠵱家排尾5。
諾域治3線有杜布連、亨格比同極當打嘅李爾哥夫,但連續6場冇入波,排尾3。我喺電視機旁睇住佢哋走上走落,踢高Q大棍足球都幾心酸;好彩同場加映名模納奧美金寶撐昆士柏場,佢簡直係午夜甜心。
蘋果波神
股市大旺,英超盛世,大家齊來贏多啲!
http://hk.myblog.yahoo.com/footballexperts/