影后林嘉欣同鄭伊健合作過唔少電影,今日為慶祝初七人日,佢哋就搞搞新意思,合力下廚為大家試煮日式料理壽喜燒(Sukiyaki)。
林嘉欣同鄭伊健做戲就叻,佢哋嘅廚藝又得唔得呢?一開始嘉欣已經「現真身」要伊健幫手開爐,伊健都不惶多讓將牛膏當係豬油,嘉欣仲話:「好明顯大家好耐冇入廚房,有啲唔對路,真係想走先!」
佢哋邊煮邊吹水,期間嘉欣問伊健以前有冇同袁劍偉導演合作?伊健即刻搲晒頭問邊個係袁劍偉?嘉欣嬲到作狀打伊健,事關袁劍偉係嘉欣老公!其實伊健點會唔識佢老公呀!佢想整蠱嘉欣之嘛!
雖然嘉欣煮嘢食睇嚟真係唔多掂,不過對新年習俗就做到十足十,廿八洗邋遢、用柚葉沖涼、行年宵、封利是、拜年樣樣做足,原來影后喺屋企都係一位滿分嘅賢妻良母。