英格蘭U20周日擊敗委內瑞拉U20捧走世青盃，大師兄朗尼喺社交網絡祝賀一班「幼獅」，係想呃like定dislike呢？

周六英格蘭喺世盃外大戰蘇格蘭賽前，朗尼雖然冇份入選今次大軍，都有喺社交網大方祝福一班隊友，只可惜最後呢場英蘇戰只係踢成2:2。不過，一日後在世青盃出戰嘅幼獅軍團就巧威威，靠卡維特利雲一箭定江山，以1:0力挫委內瑞拉奪冠，替國家一圓51年大賽冇盃嘅遺憾。

作為國家隊隊長，朗尼當然再喺Twitter祝福一班師弟，佢咁寫：「恭喜英格蘭U20成為世界冠軍，好偉大嘅成就。」不過，近年因水準跌watt經常畀人插嘅佢，一句好正常嘅祝福，都一樣會有人乘機抽水。有位網民就話：「係嘅，31歲嘅朗尼都應該去U20踢波，用你嘅邏輯吧！」不過，當然始終有好多球迷比較正面，鼓勵朗尼，希望下年就輪到佢幫英格蘭捧走世盃。

其實，球迷又冇謂太敏感，覺得朗尼出嚟呃like，大把英格蘭名宿都有恭喜幼獅，好似舒利亞、里奧費迪南、施文、加歷查甚至現役國腳哈利卡尼等，都一樣有出post恭喜佢哋。