當年今日
關於我們

快樂的社交舞愛好者(下)|陌樂偈

蘋果日報 2018/06/12 19:00

陌樂偈地區消息蘋地產房專欄社交舞

上回提到,我遇上了一位熱愛社交舞的太太。

她用手提電話播放了一段影片給我。

片中是一間酒樓,一邊燈火通明,跟一般的酒樓一樣,擺放了枱櫈給客人食飯,另一邊則是一個燈光昏音的舞池,播放著社交舞專屬的音樂,一對一對上了年紀的先生女士,就在這舞池上翩翩起舞。

「嘩!好震撼!估唔到香港仲有啲咁嘅地方。」

「哈哈~好多地方都有㗎,你冇留意,所以就唔知。」

「社交舞有幾多種㗎?」我問。

「主要有十種,分標準同拉丁」

「標準同拉丁,有咩分別㗎?」

「標準嘅通常就斯文啲,拉丁嘅就激烈啲、熱情啲。」

「例如係轉圈、抱起個人嗰啲,就係拉丁?」

「哈哈哈,係喇~」

「咁你跳邊隻多?」

「我跳標準,有慢三步、快三步、探戈、快四步同埋狐步,我全部都識跳。」

「你哋個個星期都會去跳舞?」

「係呀,有時一個星期去幾次,退咗休冇嘢做,咪去玩吓囉~」

「你唔似退咗休喎,個感覺好young~」

她會心微笑地說:「多謝你~」

「你成日都笑,令人哋都好開心,我頭先一坐落嚟同你講嘢,你就已經對住我笑,好少陌生人會好似你咁。」

「開心又係做人,唔開心又係做人,你話係咪?」

「當然係啦,不過有時開唔開心,唔係自己控制到。可能因為你keep住跳舞,所以成日都咁開心。」

「係㗎~跳舞會令到個人開心啲~」

「搵到自己嘅興趣真係好緊要,唱歌跳舞定做運動都好,除咗可以陶冶性情,自己仲會期待學新嘅嘢,諗下點樣先可以做好啲,個人會有目標好多。有好多人每日剩係返工放工,冇咩興趣,就會覺得生活好枯燥。」

她接著說:「係呀,所以做人一定要培養自己嘅興趣。」

「咁你退休之前做邊行㗎?」

「我以前份工又係會令人好開心嘅~ 喺醫院產房度做。」

「做護士?」

「唔係,普通員工,乜都要做,都幾辛苦㗎,不過成日都見到BB出世,好開心!」

「係咪好似睇戲咁,BB一出咗世,就會喺出面聽到BB嘅喊聲?」

「都係㗎~」

「但係你同時都會見到啲媽媽好痛苦?」

「係,會見到佢哋唔開心,又會見到佢哋好開心,然後啲媽媽最後會多謝我哋。

人生就係咁,要捱過先會珍惜。」

「會唔會就係因為呢份工,令到你個人成日都咁開心?」

「唔係㗎,我細細個已經係咁。」

「咁可能你嘅DNA就係咁,由你喺產房出生嗰一刻開始,就注定會為世界帶嚟好多歡樂,然後感染其他人,令更多人開心。」

快要到站了,我們恰巧在同一個站下車。

她說:「今日同你傾偈都好開心~」

「我都係~」

「有緣再見~」

「哈,你講埋我平時會講嗰句對白~」

「哈哈哈~係咩?」

「有緣再見~Bye Bye~」

她比我先下車,她的一位朋友在車站等她。

我看著她和朋友一邊行一邊傾偈的背影,兩人傾得十分開心 。

這個世界就是需要這種樂觀的人,令世界變得更快樂。

我們不知道對方名字,沒有交換電話,就此告別。

我們都是陌路人,就這樣傾了一場陌樂偈。

_
專欄作者簡介:
陌樂偈
每天跟一位不同身分、年齡、職業、性格的人傾偈,
能夠鍛練膽量、增廣見聞、建立自信、提升溝通技巧。
別再被手提電話俘虜,從互聯網回到現實世界吧! 

Facebook專頁:
https://www.facebook.com/ChatToStranger

發掘更多身邊的小城故事,請LIKE 蘋地 Facebook Page,並設定為「搶先看」: https://www.fb.com/appledailyland