當年今日
關於我們

【盤點城中名媛】邱德根孫女帝盛打骰 「糖王」索女做香拉主席

蘋果日報 2017/02/16 00:01

鄭志雯霍思緯林心兒邱詠筠何琍琍趙式平郭惠光

華光船務主席趙世光同何琍琍所生嘅三女趙式平,日前被《蘋果》影到佢陪媽咪行街,見式平化淡妝個樣同鍾嘉欣BB有份相似,原來圈中有唔少「富三代」嘅名媛淑女長得樣子標緻,兼幫手打理家族生意。
鄭家純次女鄭志雯
彤叔孫女、鄭家純長女鄭志雯(Sonia)喺哈佛大學讀應用數學畢業,老公係「鋼鐵大王」龐鼎元孫兒龐建貽,鄭志雯曾做過投資銀行及私募基金工作,09年重返新世界接掌酒店業務,發展海外酒店,2011年晉升新世界酒店主席,2013年擔任新世界執董。
「糖王」囡囡郭惠光
「糖王」郭鶴年女兒、香格里拉執董兼主席郭惠光,畢業於名校哈佛,最早參與家族生意,曾任職摩根大通做財經分析員,2003年加入《南華早報》,由記者做起,翌年加入董事會,其父郭鶴年為嘉里建設及香格里拉酒店集團嘅老闆。
邱德根孫女邱詠筠
邱詠筠(Winnie) 畢業於英國倫敦大學國王學院,完成商業管理理學士學位,現時喺帝盛酒店「打骰」任總裁,出名靚女,不過似肥底嘅爸爸邱達昌,身型有啲圓潤,佢曾試過的起心肝減肥,Winnie同前特首曾蔭權囝囝曾慶淳拍過拖。
林建岳囡囡林心兒
亞視已故前主席林百欣孫女、謝玲玲同林建岳所生嘅林心兒,一向活躍喺名人圈,不時出入ball場,生得幾靚女,最近喺旗下寰亞公司工作做電影嗰邊,佢自言對電影及娛樂嗰邊有興趣,雖然讀書唔係讀電影,不過都鍾意睇電影。
霍震寰大女霍思緯
霍英東孫女、霍震寰同陳琪琪所生嘅大女霍思緯,豪門家教森嚴,霍思緯亦唔喜歡夜生活,性格低調,亦係ball場稀客,現時幫手打理霍英東教育慈善基金,以及搞自己嘅珠寶品牌。