【收市閒情】雲遊完美示範「中國式罷免核數師」（千頌C）
蘋果日報 2020/05/30 13:28
雲遊收市閒情千頌C中匯安達
千頌C：港交所將變中概股難民營，遊戲規則將由中資話事；資本市場玩法，由有規有矩，變成中國規矩。- 雲遊周五收市後，趕通告尾班車，表示要罷免核數師羅兵咸。
雲遊（484）周五收市後，夜晚10點前趕通告尾班車，悄悄出一份換核數師公告。呢個時候出通告，醒呀！星期五晚，一來夜啦，二來仲有兩日先到星期一，諗住博人睇唔到？你錯啦！我睇到！
雲遊就話，要罷免羅兵咸（PwC）！通告內容大致係話，PwC問雲遊拎數，雲遊唔俾之餘，仲要話「本公司認為羅兵咸永道已不願就2019財政年度財務報表發出經審核報告。經過長時間的準備及包容後，董事會一致認為繼續永無止境滿足羅兵咸永道索取資料的要求可能不符合本公司的利益。」之後仲罷免埋PwC，然後揾咗間平嘅～咁嗰間係邊間呢—中匯安達。
中匯安達有咩背景？去google一揾，就揾到蘋果上年新聞，題目係：
【蘋果X檔案】問題股核數市場有得做？中匯安達包起三分一
情況就似你去補習，老師不停問你問題，然後你拍枱話「好啦喎，問問問！Q識呀！我都忍得你耐啦，我要炒咗你！」然後走去揾一個有第二種專長嘅補習老師，希望自己考試可以100分。
話說雲遊上年11月煲已爆，公司前主席、首席執行官兼執董李魯一，上年11月因為俾內地部門調查而辭任，於是由前TOM.COM副總裁韓軍接手所有職務；之後又爆出可疑交易，然後雲遊三名獨董，今個月同日仲一齊辭職。雲遊？真係你買埋我嗰份。
隨住「港版國安法」通過，香港進一步染紅，港交所（388）變中概股難民營，遊戲規則將由中資話事；資本市場玩法，由有規有矩，變成中國規矩。會計界首當其衝，今次雲遊惡人先告狀，喺羅兵咸炒佢前「先發制人」，率先示範「中國式罷免核數師」，恐怕預視「中國式核數」將大舉入侵香港，到時「你唔幫我造數，我唔俾你核數」。