【李八方online】工聯會借中電過橋 收集選民個人資料？
蘋果日報 2019/09/19 16:03
中電區議會工聯會個人資料李八方ONLINE何啟明李健聰許錦成
區議會選舉將至，唔少政黨好努力爭取選民支持，除咗一般蛇齋餅糉，有社區主任都會幫街坊申請吓福利，爭取支持。不過工聯會竹園南社區主任李健聰嘅橫額就引起爭議，有人質疑佢借一個協助申請中電減電費嘅服務，有違規收集居民個人資料之嫌。工聯會立法會議員何啟明就澄清，佢哋只係轉介個案去非牟利機構，強調無濫用個人資料，又反問「民主黨都轉介好多個案畀社署，唔通又係濫用咩」？
八方最近收到竹園南區議員許錦成投訴，話發現李健聰有一張協助申請中電減電費服務嘅橫額違規，引述中電話相關電費減免計劃只係可以由認可非牟利機構申請，而工聯會並唔係認可機構之一，質疑工聯會違規收集居民個人資料之嫌。八方搵過李健聰，佢就話：「哦，咁樣，我查詢吓先回應你」。
身兼觀塘區議員嘅工聯會何啟明就向八方澄清，地區工作成日會接觸到好多轉介個案，相信同事係透過橫額「話畀街坊知有呢個計劃」，如果有需要就將街坊轉介去認可非牟利機構，「我哋成日轉介個案去社署架喇，係一般社區工作」。何啟明又話，如果街坊對收集個人資料有疑問，可以搵其他信任嘅政黨同機構，又話一向喺使用個人資料上有準則，反駁「民主黨都轉介好多個案畀社署，唔通又係濫用咩？」