周子揚上年同何傲兒連環13咀，疑介入「爺孫戀」，不過，當時何傲兒單方面宣佈分手，跟手又被人影到佢、周子揚及友人同遊首爾，今年更被周刊影到佢哋喺車廂見面，似乎係轉玩地下情，之但係，何傲兒就話佢哋只係朋友，周子揚又話專心事業，冇拍拖打算!

講係咁講，今日被周刊被爆佢同有「翻版唐詩詠」之稱嘅大台新人曹思詩(CC)先去將軍澳一間酒店餐廳，兩個人邊飲酒、邊吹水，跟手周子揚上咗CC屋企兩粒鐘，二人直至凌晨先落樓，再一齊半夜放CC養嘅兩隻狗仔，發展寵物情緣，周子揚更主動抱住CC嘅其中隻愛犬，不時同CC有講有笑。

據知CC喺14歲出道娛圈，有一段時間改名叫曹卓榣，出過寫真，又同Bosco拍過戲，近年加入大台，除咗同蔡思貝、陳嘉寶一齊做YAMAGirl，又會喺大台劇做下閒角，早前拍《潮拜武當》更要性感上陣，同周子揚調情，剝剩個bra，據周刊指，當時未埋位時，CC已經著住個bra喺廠四圍行，盛傳周子揚都好嗒糖。

周刊都有問過何傲兒知唔知周子揚目前同CC行得好埋，似乎發展咗新戀情，何傲兒就話佢同周子揚比較少聯絡，亦冇講佢哋仲係唔係情侶關係，更唔知周子揚有新女，周刊稱當何傲兒睇到周子揚同CC夜會嘅相時，何傲兒仲有啲黑面。