沈穎婷（Winnie）、陳嘉莉（Kelly）、鍾溥敏同李依雯今日喺灣仔榮拳館打NOVA CUP新星賽，邵仲衡都係拳館常客，專登嚟支持老闆，邵仲衡因為視網膜曾做手術，打比賽受重擊隨時會盲，所以只能夠練習玩下，稍後佢會為ViuTV開拍新劇，o依家用健康方式減肥。近日捲入莊端兒同公司解約是非嘅王宗堯亦有捧場，佢話對事件已經回應晒，冇嘢再講。

沈穎婷為今次賽事過磅前一日不吃不喝，原因係磅數未達標，佢話：「本身差2KG，要不停脫水先過到磅，都有壓力，今次對手氣勢好強，輸贏都攞個經驗。」沈穎婷仲笑言：「媽咪叫我唔好俾人打死，妹妹就叫我唔好損手爛腳。」最後佢以一分險勝對手，話會盡快向媽咪同妹妹報喜訊。

陳嘉莉獲好友麥子樂同師兄王宗堯撐場，佢最終以三分輸俾對手，喺擂台上打到汗水四淺，多次被擊中面部，幸好冇受傷。陳嘉莉話賽前緊張到唔敢講嘢，只係集中熱身，佢話：「今次比賽已經好過上次好多，但體能再要練習，自己都做咗好多準備，會更努力面對11月挑戰。」