喺今個月初，年僅25歲嘅孝子郭家浩，喺返兼職送薄餅期間遇上車禍身亡（新聞連結： http://bit.ly/2hw8WLL ），今日由無綫主持阿感（黎國輝）率領佢隊籃球隊HERO，喺旺角麥花臣室外籃球場舉行一場「無名英雄郭家浩慈善籃球活動」，目的係幫郭家浩嘅家屬籌款。

阿感向傳媒表示，因為得知郭家浩及胞弟、香港泳隊新蛙王郭家輝都熱愛運動，咁啱郭家輝係方力申（小方）師弟，所以喺事發後安排咗呢場籃球賽，希望可以做啲嘢幫吓郭家。阿感指早前透過唔同團體，包括慈善團體以及本地各支籃球隊，合共籌到6萬蚊，阿感噚晚已經將筆錢交畀噚晚有到場嘅郭家輝。

「大隻仔」溫家偉同周志文噚晚都有到場，佢哋話有捐錢，略盡綿力，大隻仔仲話自己原本喺新加坡開緊工拍劇，但為咗呢個活動飛返嚟，今日又再飛返新加坡。

至於周志文就話近日忙於同羅孝勇拍片，嚟緊聖誕新作係一條有關情侶之間嘅片，被問到有冇搵緋聞女友蔡思貝拍，佢就咿咿哦哦唔肯正面回答，問佢有冇邀請蔡思貝嚟睇？佢又係hea答。

有就有，冇就冇，都係一句啫……