贊助NBA勇士球星史堤芬居里球鞋嘅美國品牌UnderArmour（UA），已經就早前福建省廷飛龍體育用品有限公司同埋關聯公司安德瑪（中國）有限公司發佈侵犯咗UA版權嘅「UncleMartian」向福建省高級人民法院提出商標侵權同不正當競爭訴訟，要求至少賠償1億元人民幣（約1.2億港元）。

UA發表聲明指出，兩間公司發佈嘅「UncleMartian」侵犯咗「UnderArmour」商標、企業名稱、UA圖形同其他知識產權，已經喺於2016年6月27號正式提出訴訟，要求法院發佈禁令同埋判處賠償金至少1億人民幣等。UA同時分別通過中國國家商標局同香港公司註冊處，對呢兩間侵權公司採取相法律行動。

不過喺中國發生嘅侵權案，往往係中國嘅「山寨」公司佔優，例如深圳手機公司佰利喺2014年9月入稟控告蘋果公司發布嘅iPhone6兩款產品，涉嫌「山寨」佰利2014年4月、7月獲批的手機設計外觀專利，今個月較早時候北京知識產權局裁定iPhone6和iPhone6Plus兩款手機外觀設計侵權，要蘋果停止銷售。至於美國著名運動品牌NewBalance喺中國嘅關聯企業「新百倫貿易(中國)有限公司」，今年4月亦被判侵犯他人商標「新百倫」(NewBarlun)專用權，要賠償9,800萬元人民幣，又睇吓今次UA告「UM」案最後會點樣判啦！