上海幫喺商界好有地位，噚日上海市在港窗口公司上實集團慶祝廿五周年（旗下上實控股就十周年），晨咁早喺萬豪開party，唔少大孖沙撐場，好似大馬糖王郭鶴年，孖住一齊到嘅信和黃志祥及鷹君羅嘉瑞、新世界鄭裕彤、上海姑爺瑞安嘅羅康瑞，同埋滙豐大班鄭海泉等，咁多重量級嘉賓到賀，主人家蔡來興開心到四萬咁口。
至於禮到人唔到嘅，有出咗埠嘅超人李嘉誠、新地郭氏三兄弟、中信泰富榮智健、六叔邵逸夫、震雄蔣震，同埋新翁許榮茂等，花牌排到無位擺；惟獨一早話會到嘅梁伯韜，最終甩底唔見人。
踏正10點，董事長蔡來興到場迎賓，一見彤叔同郭鶴年，三個人開心到拖住手敍舊，十足小朋友玩氹氹轉。轉頭蔡來興又拉住高佢成個頭嘅中聯辦女幹部郭莉巡場，介紹自己及公司嘅威水史；見到上海姑爺羅康瑞，就同對方大講上海地產，最近買咗邊幅地，大展交際手腕。

蔡來興走出去

蔡來興喺慶祝儀式上，介紹佢哋喺81年至今，由「一包香煙、一本掛曆、一袋味精」起步，做單一嘅生產實業。到95年開始起飛，到96年5月將上實控股在港上市，為配合上海經濟急速發展，至今在港集資累計350億元。踏入05年，集團轉型為集成商，配合國家政策「走出去」，首次帶領港滬七大企業，走到俄羅斯聖彼得堡建設「波羅的海明珠」項目，總投資13.46億美元，打造為國際經貿集成商。集團嘅資產，亦由當初嘅2億，發展至今日近500億元。
成個典禮節奏都算明快，一粒鐘唔夠就完，之不過個個嘉賓齋企冇得坐，都咪話唔辛苦，結果一宣布儀式完畢，賓客一哄而散，走得最快嘅，講你都未必信，就係篤住支「士的」嘅鄭海泉，其次就係八十有一嘅鄭裕彤，不過彤叔原來唔係趕住走，而係人有三急！
李華華
[email protected]