國際小姐澳門代表嘅麥嘉欣（Sofia Paiva）同香港代表王詠珩（Wing）今日喺《蘋果》娛樂直播節目《今日ENT》現身，嚟緊出戰10月東京舉行嘅國際小姐競選。

對於今屆港姐三甲，唔少網民表示冇眼睇，仲叫「香港小姐」改為「TVB小姐」，網民好多人都讚佢哋靚過港姐？麥嘉欣稱每個人眼光唔同：「佢高過我，有經驗過我，大家睇嘅嘢都唔同。可能人哋鍾意，外國sexy過我，(你都sexy)我唔得嘅(好怕羞咁樣) 。」而王詠珩就話：「每個人對靚嘅定義唔一樣，可能係自信美，大家欣賞美嘅唔同，好難評論。」

咁之前澳門打風，麥嘉欣當時做緊乜？澳門代表麥嘉欣話：「我係屋企，之前都係掛8號，但瞓醒覺，覺得唔對路，外面好大聲，個心唔安穩……咁我瞓醒不早嘞!」

講到香港同澳門男仔有乜分別？麥嘉欣話：「有接觸過香港男仔，我對面都有好多港男，哈哈。我覺得香港男仔鍾意打扮過澳門男仔。」王詠珩就話：「我唔係好鍾意努力打扮嘅男仔，喜歡自然，唔鍾意chok住。有去澳門，但冇乜留意。」