等咗26日，勇士明星控衛史堤芬居里（Stephen Curry）終於都返嚟喇，喺勇士主場對灰熊場波復出。主隊賽前講明只係會比咖喱仔打20至25分鐘左右，結果第一場就「超標」打咗26分鐘，好在居里復出第一場就爆seed射入十個三分波，全場收穫38分，幫勇士喺主場大勝灰熊141:128。

咖喱仔今場17次起手入13球，當中三分波13次出手射入十球，今季第九次單場入最少30分，好明顯無因為扭傷右腳休息咗11場而搞到無晒手感。勇士前鋒杜蘭特（Kevin Durant）今場都射入20分，另外有9助攻、5籃板，後衛K湯遜（Klay Thompson）亦都貢獻21分，就連中鋒柏祖利亞（Zaza Pachulia）都射入個人今季最高嘅17分，佢另外有8籃板同6助攻。

灰熊今場都有六位球員得分達雙位數，當中表現最好係射入27分同搶到6籃板嘅馬克加素（Marc Gasol）。不過，面對今場三分命中率達到54.5%嘅勇士，灰熊就算射入今季最高嘅128分，都係要輸俾勇士。

今場波另一個焦點，係勇士前鋒祖蒙特格連（Draymond Green）喺第二節剩返9分45秒嘅時候，因為第二次拎技術犯規被趕出場。當時已經有一個技犯在身嘅格連，喺俾球證吹罰犯規後係咁易揚咗一下手，點知就被判第二次技犯自動離場。

--------------------
BFB CHAMPIONS 2.0 聖誕新年活動連環出擊，登入即送傳奇球星「林伯特」！ http://bit.ly/2xrTKGM