【李八方online】鄭宇碩健康問題 辭任華人民主書院董事

蘋果日報 2018/12/16 13:14

守護公義基金民主動力李八方ONLINE鄭宇碩華人民主書院

人生七十古來稀,雖然依家人類活到七老八十唔少見,但能夠喺民主路上堅持到差不多70歲就絕對珍貴。講緊嘅係「華人民主書院」董事、香港城市大學前政治學教授鄭宇碩,佢日前因為健康原因辭任華人民主書院董事一職,八方關心過鄭教授身體狀況,教授話健康問題就不便透露,但暫時冇乜大礙,只係希望可以多啲時間陪伴屋企人,就連網台佢都會慢慢減少出席。
鄭教授一直都為民主派擔任支援角色,除咗華人民主書院之外,教授話佢亦已經辭任支援DQ案同佔中九子嘅守護公義基金信託人,基金已經搵緊接任人,但就要等對方答應落實先可以公佈。一次過退出晒一手一腳推動咁多年嘅組織,教授睇得好開,無唔捨得,佢話無論民主動力定係華人民主書院都有年青一輩接力,完全冇後繼無人呢回事,自己亦好樂意得閒返去做吓義工。
臨別依依,教授畀後輩兩個字,就係堅持,「大家都知依家係民主運動艱難的時刻,要爭取到民主真係好難,但要堅持落去」,堅持咗咁多年嘅教授「真退休」之後,終於有時間做吓自己想做嘅嘢,「多啲陪屋企人,去吓旅行,睇多啲小說」,仲話可能會出書添。