鄭秀文今日喺灣仔出席「奇華80周年 X 心晴行動慈善餅食工作坊」記者會，Sammi係潮州人，回想結婚時，愛傳統嘅佢都有食潮州禮餅，但佢話自己唔叻整甜品，所以好多餅類食物都唔識整，反而燉或燜煮嘅食物會叻啲。

做完活動後Sammi就趕住飛去台灣拍MV，27號朝早會返香港出席老友林燕妮嘅喪禮，最初因為工作關係未能出席令佢一度好唔開心，幸得公司安排，最後都可送別老友。佢讚林燕妮係好優雅，亦好鍾意靚，所以到時會悉心打扮：「佢係真正好優雅，講嘢同一個tone，我會著得隆重少少，想最後一次，想佢知我重視件事，想俾佢有好印象，天家見。本身屋企有新衫，所以唔使刻意買過。」

堅強嘅Sammi被問到時會唔會喊，佢話：「對一個人既思念，流眼淚係正常、自然，唔使刻意抑壓住，之前佢走嗰幾日就唔慣，諗起就喊，到時送佢最後一程已經好好。」

精選娛聞，喺晒《娛果》
http://fb.com/appledailyent