好想構思一個純粹嘅愛情故事，其實一直以來都構思緊，只不過隨着時間過去，想法有啲唔同，睇法亦都有啲改變咗。總覺得有啲嘢未搞通，咁點去拍一個愛情片呢？
純粹嘅愛情片其實好罕有，我記憶中印象深刻嘅已經係《秋天的童話》同《甜蜜蜜》。其餘夾雜咗喜劇或者係用度橋去講故事嘅，我唔當係愛情片。因為呢類型嘅戲會令我記得有套喜劇好好笑，裏面段感情都寫得幾好。或者係估唔到睇咗部警匪片原來係講愛情嘅。然後，就乜都唔記得。我覺得好睇嘅愛情片係令你永遠記得裏面嘅角色，我記得「船頭尺」喺橋上面跑，我記得陳小軍最後一封畀佢太太嘅信裏面講嘅說話。我記得張曼玉喺紐約做導遊時穿的衣服，記得鍾楚紅戲裏面嘅髮型，陳百強揸嘅開篷跑車。最重要係我記得佢哋嘅愛情故事。

好佩服有創作人喺愛情片內唔用「度橋」去搞掂個故事，因為實在係比較容易嘅方法。我最怕係睇到啲愛情片嘅「橋」係「原來有絕症！」或者係「原來係兄妹！」離譜啲就「原來係鬼！」咁不如我度條橋畀你「原來條女係男人！」相信應該夠玩九十分鐘。我覺得只有面對愛情，夠耐心仔細講你愛一個人嘅感覺，夠狠心拍你恨一個人嘅感受，才會變成一個感動到其他人嘅故事。所以我每次都係度吓度吓就冇再繼續，因為我怕變咗個講耶穌嘅導演，更重要嘅係我有好多嘢都未敢講。
我相信每一個導演都應該有一個動人嘅愛情故事可以拍成電影，嗰部電影一定係講佢自己嘅愛情故事。