內地電影業禁忌多多，《色，戒》「疑似」歌頌漢奸，女主角湯唯就被全面封殺；香港嘅電影人成日掛住「北望神州」，題材上畏首畏尾，結果棧整死自己……

高明輝：有傳聞話封殺佢嘅就係因為呢個原因。但問題係，湯唯只係其中一個角色，寃有頭，債有主，要封殺，點解唔搵梁朝偉或導演李安祭旗？

楊卓華：根據過往經驗，只要國內女星一喺外地紅咗，就會有人睇唔過眼，慣常嘅手法就係將女星描繪成「漢奸」，例如趙薇着件日本軍旗design嘅時裝，就被人淋屎；章子怡拍《藝伎回憶錄》扮日本人，又被人鬧佢係漢奸。

袁：我覺得被封殺至少要講出原因，但內地廣電總局至今就仲未清楚講出封殺嘅真正原因，咁樣直頭影響咗成個香港電影業，因為大陸市場對佢哋非常重要，但就唔知個審批標準喺邊度。

楊：香港電影業最蓬勃就係七十至九十年代初，嗰時內地市場都未開放，但港產片反而發展得最好，本地市場蓬勃同時，又可以賣埠賺錢。九七年回歸之後，電影人以為可以「北望神州」，結果表現反而越來越衰。

高：會唔會係因為娛樂多咗，觀眾嘅口味又多元化咗？𠵱家有荷李活、日本、韓國，甚至乎東南亞片，又或者觀眾唔一定要坐定定個半鐘睇戲，改為上網上YouTube睇短片，選擇多咗？

楊：但呢啲唔係只在香港發生，美國電影人都要面對，但係人哋就搞得掂，票房持續有增長，所以重點應該係拍出嚟嘅電影究竟有冇質素，有質素就有競爭力。