長和系主席李嘉誠加強總部中環長江中心嘅保安,陸續喺兩個電梯大堂安裝入閘機,即係好似中環國金,喺樓上返工嘅員工要拍卡先可以上樓,訪客就一定要登記。不過入閘機𠵱家仲未完全裝好,得個樣!
長江中心1999年落成啟用,大堂守衞以前唔算森嚴,普通人都幾易上落。中環八卦友估計,超人加閘應該同今年初碼頭工人示威工潮有關,當時有20名學聯同左翼廿一成員,成功喬裝到達長江中心7樓,即長實(001)總部寫字樓抗議。
據講,長江中心之後開始加強保安,所有人要排隊出示證件先至可以乘電梯上樓。有喺長江中心返工嘅老友話,見過長實董事甘慶林、葉德銓、趙國雄排隊乘電梯,佢哋位位要員兼年薪超過2,000萬元都要守規矩。
為長遠計,長江中心早排開始安裝入閘機,地下同上一層嘅電梯大堂都裝晒,出入要拍卡。