羅敏莊同陳國邦安排女兒陳禛就讀英基國際學校，擺脫香港傳統學校填鴨式教學製度，可以做個輕鬆家長同快樂小朋友，8月15日係陳禛開學日，亦係佢入讀學校第二年稱之為YEAR 2，相等本地小學一年級，開學前席羅敏莊唔算要為女兒奔波，因為她一直支持小朋友自由教學發展，自己都經歷過童年，覺得童年開心與否好重要，會影響日後成長，兩母女日前仲一齊到琴行玩音樂，唱下歌笑對開學。

當初為女兒選讀國際學校唔想孩子承受太大壓力，更關鍵是母女關係，羅敏莊話：「成日聽人講傳統學校功課量好大，我哋以前細個冇依家咁多功課，成日見到啲媽咪要陪個小朋友做功課做到好夜，又太多功課，有時小朋友都唔想做咁多，但媽咪癲咗咁教佢做迫佢做，我好怕呢個情況出現，一來我又懶，唔想做功課，唔想迫佢令到我哋關係好差，覺得呢段時間可以玩下，好多嘢唔係要塞填鴨咁塞入去學，佢依家返學校都學到好多嘢，有時會教返我轉頭，例如一啲通識，月亮幾時月圓，幾時唔係全月，呢啲都幾好，阿女又會同我講媽媽要用少啲膠袋。」在旁陳禛即接住解釋話：「啲膠掉落海，啲魚會拎嚟食，然後就會死亡。」

羅敏莊認為呢種教學方式，家長比較輕鬆，小朋友能夠學習，佢舉例話：「阿女五歲幾已經識英文拼音，佢會睇書放膽讀出嚟，因為老師教佢哋無論啱或錯都讀出嚟，如果錯冇問題，會糾正你，但一定要放膽啲，俾信心自己，呢啲係我哋小朋友應該學，但又缺忽咗，細個睇到英文係死背，例如cat點解會係cat，老師又冇講點解，只叫你背識同默出嚟，但依家佢哋會學拼音，覺得呢種方式好過我哋以前嗰種教學。」而實際上現時陳禛返學時間都係全日制，返早上八點放下午三點，同一般學校無異，但返到屋企就唔使做功課到夜晚咁辛苦，明顯比傳統學校輕鬆得多，而校內亦設有足夠興趣班吸取智識，稍後陳禛仲會學游水同體操，自由教學都可以周身刀。

就讀國際學校自不然會忽略中文，呢方面羅敏莊唔擔心：「我哋講廣東話，講冇問題，寫就要教，學校有中文堂，但就教普通話，寫繁體字，呢方面我要落多啲心機教中文，我中文ok所以唔怕，反而英文我未必教到佢。」除咗返學之外，作為媽媽都會身教，好多嘢都係母女互相影響，見到陳禛彈琴唱歌都好有媽媽影子，而今時今日羅敏莊亦專登為阿女學習更多，佢話：「以前我哋邊有咁多呢啲嘢玩，依家佢哋睇完學完啲歌曲教返媽咪都幾好，我有時迫不得意都要學。」

採訪：卓寶花
攝影：仇志德
DV片段：馮嘉銘
場地提供﹕柏斯琴行(黃埔旗艦店)