蒙古能源（276）早幾日慘遭洗倉，股價喺禮拜一插水28%，市值一日間蒸發82億銀，第二日蒙能股價仍然未止瀉，一度再跌24%，好在收市跌幅收窄，不過市值仍然唔見24億銀。
市場當時盛傳，股東之一彤叔鄭裕彤call好友入市撐蒙能，令股價唔再跌得咁甘。華華都周圍打探究竟彤叔call咗邊個friend入市，咁幫得手，結果噚日開估。
蒙能發通告，話主席魯連城增持股權，哦，原來彤叔嘅friend即係佢嘅掌櫃魯主席！

市值反彈64億銀

魯連城以每股平均價2.946蚊，掃咗435.9萬股蒙能，佔蒙能已發行股本0.072巴仙，涉及金額1284萬銀。
話晒彤叔係蒙能股東之一，揸住8.21%蒙能，早幾日蒙能急瀉近四成，彤叔賬面唔見8.7億銀，彤叔幾百億身家，當然係小數目，但蒙能咁樣被人洗倉，冇「飛士」，更要搵人做吓嘢，貴為彤叔掌櫃嘅魯連城，當然要即刻出手撐蒙能。
魯連城親自出手，蒙能股價當堂醒晒，最高急升逾四成，收報4.16蚊，升34%，公司市值即時反彈64億，去到252億銀，彤叔賬面即時只蝕3.5億。魯連城拎千三萬出嚟，就令彤叔蝕少5億幾，魯連城不愧為彤叔掌櫃，唔到你唔服。