噚日冬至，樂隊Yellow(野佬)晚上喺九展舉行演唱會，為咗遷就大家做節，要返屋企食飯，個騷延到9點至開始，演唱會嘉賓有盧巧音、彭家麗，而盧巧音老公Sammy就擔任監製。

野佬除咗唱自己嘅歌之外，今次特別揀咗90年一啲流行曲，例如有劉德華、郭富城，黎明等等，唱快歌都有跳舞，唱城城嘅《對你愛不完》就更加模仿埋城城嘅招牌舞蹈，唱完一輪快歌之後，佢哋索晒氣話：「喺香港排舞比較難，因為地方淺窄，我哋喺band房練，好細，今年至正式喺台上跳。」

跟住野佬又拎劉德華嚟講笑，佢哋繼續索晒氣話：「劉德華以前唱歌嘅時候，因為唱MMO，所以唔會聽到佢喘氣聲，我哋唱現場，所以就會聽到。」

完騷之後，野佬接受訪問，講到冬至至嚟開騷，佢哋話：「因為開騷，事前已經同家人做咗節。fans都有話，所以特登改9點開，初時怕歌迷趕唔切，我哋會為每位入場觀眾派蕉，當係飯後果，可以消化。」野佬仲話希望開到part2，好似ToNick咁，之後可以轉喺大場地開騷。

更多娛聞，喺晒《娛果》
http://fb.com/appledailyent