「食花生」係就係開心，一個唔覺意自己變咗主角，就真係畢到唔敢睇。鷹隊中鋒懷特侯活（Dwight Howard）周二喺twitter同粉絲們玩吓現場Q&A，叫大家留言傾吓有關NBA選秀同交易嘅傳聞，話咁快就答咗第一條關於溜馬球星保羅佐治（Paul George）去向嘅問題，表示「佢有幾多好選擇，好難講」，點知佢之後冇再答第二條Q，好似就咁腰斬咗，發生咩事？好有可能係「魔獸」睇到自己嘅交易傳聞……

美國傳媒報道，鷹隊同黃蜂已經達成協議，鷹隊將會以31歲嘅侯活同今年第31順位選秀柱，換取黃蜂中鋒布林利（Miles Plumlee）、後衛貝利連尼（Marco Belinelli）同41順位選秀權，而黃蜂其後亦官方宣佈交易落實。侯活過去一季先以「愛‧回家」身份加盟呢支亞特蘭大家鄉球隊，交出13.5分、12.7籃板，但鷹隊最終喺季後賽首圈不敵巫師止步，球隊似乎亦有意重建，裁走侯活餘下兩年4,700萬美元嘅合約，但薪酬空間節省唔多；反觀黃蜂教練基福特（Steve Clifford）同呢位8屆明星賽成員繼魔術同湖人合作後再度攜手，睇吓能否再度激發愛將打爭氣波。