前年參與ViuTV《全民造星》的「細貓」應智越，2013年已赴韓國讀音樂再修讀大學，同時開始在韓國當練習生，前年《造星》比賽後，細貓因為要返回韓國繼續學業而沒和ViuTV合作，去年12月才完成修讀科目，雖然細貓在當地捱得住長期軍訓式刻苦練習，但始終要面對文化、種族壓力問題，難以跑出，細貓最終放棄做韓國追夢，回流香港發展。近日細貓簽新公司首在香港推歌，為吸引觀眾眼球，特意揀選跳唱歌《約你跳舞》，集合港韓風製作。

24歲的細貓日前接受《蘋果》專訪，細訴過去7年當練習生苦樂，也談到近日武漢肺炎在他另一家韓國大爆發。原來去年12月完成大學課程的細貓，本於今年2月舉行畢業禮，卻因武漢肺炎疫情影響要延期至8月。

日前才由韓國返港的細貓表示：「韓國我啱啱返去時，口罩係仲有嘅，未去到完全冇晒嘅。咁當然當時價格有稍微上升，而家價格係再上升咗，同埋而家係好難再買口罩，韓國人你話平時注唔注重衞生呢？其實對比起香港，係仍然唔注重衞生，都開始有人注意，有人戴口罩，但仍然有人唔戴口罩嘅，係危險囉。之前都有提過飲食文化問題，好興一碗湯一人一匙羮插入同一碗湯慢慢飲嘅，呢個係佢哋其中一個飲食文化，令到佢哋會迅速傳染嘅一樣嘢。」細貓表示自己有很多香港和韓國當地朋友，對近日武漢肺炎大爆發，朋友們也相當擔心：「佢哋都話盡量避免出街，同埋會注重衞生。原本我3月返去做啲嘢，但而家都唔會返住。」

一般大學學士學位4年時間完成，細貓因參加節目及其他活動，令求學時期讀足7年，講得一口流利韓文的他說：「韓國老師比較偏幫韓國學生，韓國人參與韓國節目攞個等級會好啲，可能外國人參加節目冇咁高分，有啲刁難。」直認人在異鄉吃不少苦頭，經常被怒罵，他說：「係軍訓式比較嚴格，成日都會俾人鬧，香港學嘢老師會叫你加油畀心機，但韓國就唔係，會訓話式同你講。」

現今整個娛樂圈受疫情波及，幾乎全面煞停，回流香港發展前景未明，細貓作好最壞打算：「困難預咗，反而正正呢個時期香港人更加需要放鬆同正能量，如果一直疫情未完結，好消極……呢個時候出歌抱住一個心態哪怕畀到一點點慰藉大家都好。」細貓擁有一把獨特高音聲線，原來他一直不自覺：「直頭係女音，啲人成日話我唱歌似女仔，一直都唔知，以前喺韓國訓練個個都話你咁樣唱就啱，潛意識覺得應該係，返到嚟玩《造星》時火火問點解呢個係啤啤熊聲嘅？嗰下我先知。」

至於為何捨棄韓國發展？細貓坦言：「嗰邊訓練最慘係睇唔到未來，當好多人識唱識跳你點樣突圍而出呢？同埋土生土長香港都想返屋企見屋企人。」豈不是放棄做Oppa之夢？他笑言：「我最初夢想唔係去做Oppa，係誤打誤撞去咗嗰邊，考完DSE去內地讀完一年音樂，之後認識咗跳舞嘅女仔，佢男友喺韓國讀書，當時啱啱興《江南style》，話韓國音樂冒起緊不如試吓去韓國，就過咗去。」

細貓在韓國辛酸史有苦自己知，由於民族不同，在當地最好朋友還是香港人，加上韓國有尊卑之分，細貓說：「佢哋尊卑好重，我叫做讀咗7年，韓國同學師弟師妹知道我喺香港做緊呢個行業，就會好驚稱呼前輩好、前輩早晨、前輩再見，好難同佢哋好close，你唔可以叫佢細佬幫我咁咁咁，就算我同佢講，唔使緊張我係外國人，佢都係會咁。」細貓形容做練習生期間未至於被人蝦，但一直也是好陌生。

在韓國集訓出名嚴厲苛刻掣肘多，例如禁止拍拖、去夜街等，細貓坦言：「有啲人都照拍，爭在公司知唔知，限制方面係一定有，最主要你成功條路要好專注，有時間拍拖就練習跳多幾隻舞啦，競爭好大，一隻舞人哋跳100次，你跳咗50次，另外50次去拍拖，會令你競爭戰鬥力低咗。」故細貓亦不敢違規私下拍拖，並呻：「識唔到韓國女仔，公司訓練係男女分開，你又唔會認識到佢哋。」

細貓在韓國返學時每日早上九點上堂至三點放學，之後到公司練習，為維持生計練習完再做便利店兼職，幾乎每日只睡幾小時，所以他返到學校上堂時會偷懶：「上堂瞓覺係唔啱，但真係聽唔明一啲韓文哲學，例如講柏拉圖式戀愛、有雞先定蛋先，我哋會用廣東話講都好易明白，但韓文寫論文就好辛苦，我就會將嗰啲時間偷偷地休息，又要讀書，又要練習，又要工作幫補生計，冇辦法。」

慶幸韓風訓練一直着重身形線條，令細貓隨時備戰，他分享小秘密，剛成年時仍然是肥仔一名，有80公斤，他說：「當時初戀失戀，好唔開心，立下決心瘋狂減肥。」現時他每日都做運動打泰拳，但凡食多碗飯都大感內疚，回流香港希望有機會騷一騷。

採訪：卓寶花
攝影：林德雄
DV片段：馮嘉銘

-----------------------------
第三屆最港電影大獎
按此立即投票
-----------------------------

《果GYM》隨身播 　健身壹App過！

一按即玩