紅灣半島醜聞，香港民意勝利，但美國商人陳啟宗條氣唔順，大罵香港人不識抬舉！朗尼．陳話：現時香港人唔想「創造財富」，只係想「分配財富」，繼而佢又發洩狂亂情緒，大罵香港係全中國最「共產主義」嘅地方，重話咁樣唔會有人投資！

小地產商再次辱罵港人
陳啟宗太子脾氣，發財毫不立品，有乜唔順眼就亂鬧，經已唔係第一次。雙普選、七一大遊行，多次辱罵港人，今次亦忍唔住口。香港人唔買樓，地產商又賺啲乜，市民係地產商米飯班主，連新鴻基郭氏兄弟都唔敢咁樣出言謾罵，反為順從民意，主張家和萬事興。郭氏兄弟都話唔拆紅灣冇問題，又幾時輪到阿陳一個人搥胸頓足兼罵大街？
西九龍文娛藝術中心計劃，主持人曾蔭權亦曾遭到阿陳罵到狗血淋頭，話反對單一投標！冇錯，計吓身家，朗尼未必夠秤，單一投標，自己唔夠力，會唔會咁就有少少眼紅新鴻基人哋郭氏兄弟，今次借啲意，想挑撥郭氏兄弟同香港人嘅感情，咁就要問向佢自己至知喎。

佢話香港變咗全中國最「共產」嘅社會，呢一樣又錯唔晒。香港有好多土共，好似朗尼一樣，滿腦仇民主反自由劣質思想，一開口就維園阿伯、義和團加紅衞兵，連大陸嗰啲都冇咁癲，香港啲共產黨極左得甚為兇狠，搞到以維園為基地、北角為核心，香港的確係全國最共產嘅城市！
至於朗尼．陳話冇人會投資，咁請佢自便喎！正如好多老左及地產商大罵香港人：唔鍾意住香港嘅，可以走，朗尼．陳唔鍾意喺香港投資，因為香港人會共佢產？好呀，咁請佢帶埋啲資金返去佢祖國美國，買兩架飛機，買三四間酒店，睇吓嗰度啲鬼佬服唔服俾一個咁嘅華人指手劃腳咁管，同埋啲工會點樣玩殘佢？
所以胡應湘講過：長毛一當選佢就走，不過佢一直到𠵱家重未執包袱喎！邊個想撤資，想走趁早，香港人好行夾唔送！



傳真︰2623-9278
電郵︰[email protected]