高鐵倒數通車，西九總站部份地方已割咗出去，內地執法人員已經南下，在站內操練，原來米奇都已經殺入高鐵站，迪士尼樂園已在站內租咗地方開客務中心，高鐵乘客一落車，就有機會見到米奇！

迪士尼傳訊及公共事務副總裁Linda同八方講，新嘅客務中心為預訂咗迪士尼酒店旅客提供check-in服務，搭高鐵旅客在西九落車，隨即可辦入住手續，如果想先在市區遊覽，可以寄存行李送去酒店，否則有專車接送去樂園酒店，開始奇妙旅程。

高鐵通車後，另一跨境基建港珠澳大橋年內都通車，Linda話已規劃專線巴士由大橋人工島到去迪士尼，車程僅10分鐘，近日佢頻頻去大灣區多個城市推廣，新產品包括600幾蚊包入場門票加單程交通，一晚酒店加可3次入場門票，最平千幾蚊起，八方都覺得幾吸引。樂園佔盡地利，Linda話希望吸引到更多家庭客、後生仔，體驗吓區內最國際化嘅主題樂園。