炒業績股，最怕係乜？最怕係份「成績表」出完後，即使係純利增長佳，派息增加都好，股價卻行相反方向，咁就最「濕滯」。事關業績已然公佈，股價表現卻呈不良反應，如果當初買定等收成，隨時變成「中伏」。除非公司繼業績後再有新利好消息出台，則另當別論。

目標價40元

不少股份相繼發佈業績，雖然箇中不少盈利顯著增長，但股價表現則未如理想，有些甚至跌得好慘。其中港機工程（044）就是一個例子。港鐵（066）明天派成績表，星俠審視過坊間對該股的業績預期，當然有人睇好亦有人睇淡，但大致上睇法都係比較中性，由於兩鐵剛於去年12月才完成合併，業績只計入九鐵一個月財務數據，這一點股友們要留意。
港股近月走勢反覆，惟港鐵表現則相對硬淨，從炒業績角度衡量，理應值博，加上港鐵合併後成為本港擁有最多土儲的上市公司之一，今年樓市當旺，料可獲市場「加分」，可低吸持中線，目標40元，以22.8元止蝕。