禮拜日沙田八草三泥賽事，草地用C跑道，呢條跑道一向對擺前走馬匹有利，以最近3月9日賽事為例，當日草地頭馬全部守前五位入直路建功，雖然勝出馬都係排中外檔起步，不過「金桂飄香」及「勇進」切入沿途貼欄，而「北非諜影」及「飛影」就走二叠跟前，轉彎走外叠好蝕底。

今次列陣馬中，尾場「華美之星」上仗正是於3月9日田C欄賽事上名，等番同一移欄先再跑當然想贏馬補中。另外，八場「贏得」兩戰田C欄非冠即亞，均速馬賺跑道形勢可坐位望贏。

至於泥地方面，1200米始終利擺前走之馬匹，反而一哩就有得追，近期「齊喝采」、「威悅」及「經典皇牌」都係後上建功，第四場「生豪」及第五場「陽光王子」等擅跑泥地中距離之後上馬可優先捧場。