特首林鄭月娥認真勤力，晨咁早去完高鐵開通儀式，夜晚又去文化中心，出席九龍社團聯會嘅國慶酒會。娥特唔係單拖現身㗎，政務司司長張建宗、保安局局長李家超同埋民政事務局局長劉江華等問責官員都有現身。不過張建宗就大膽，竟然喺活動上同埋李家超、劉江華等一齊作反，用個背脊「得」住娥特！

是咁的，娥特、張建宗同埋幾位問責局長都係主禮嘉賓，齊齊都要上台做大龍鳳。除咗由九社聯理事長王惠貞與及娥特致辭，當然有必不可少嘅奏國歌環節。大家諗諗，身為主禮嘉賓，梗係要面向台下嘅鏡頭，偏偏台上嘅佈景板又印咗大大個國旗喺度。點算好呢？

國歌一奏起，張建宗同埋幾位問責局長，夾定都冇咁齊，一個轉身兼抬起頭，望實個國旗，反而企中間嘅娥特就繼續面向鏡頭。八方企喺鏡頭後望，就好似見到張建宗等人拎個背脊嚟「得」住娥特咁款。

最慘嘅都唔係娥特，而係娥特旁邊嘅王惠貞同埋九社聯首席會長蔡加讚，佢哋似乎察覺到台上唔少人擰轉咗身，但台上最大粒嘅娥特不為所動，咁跟大隊好、定係跟娥特好呢？

八方明白了！娥特用心良苦，專登製造尷尬場面，凸顯盡快訂立《國歌法》嘅必要，大家唔好再拎娥特嚟出氣啦好嗎？

立會補選新聞，《蘋果》一網睇晒
http://bit.ly/appledaily1125