恒指最強時間應該已過，但短期內轉為日升日跌又不出奇。噚日跌完驚完，今日又衝過，呢種現象可能持續一段時間，而每次短暫炒風則限於一日起兩日止，然後好快又有震倉，咁樣搞你兩三個星期，都足夠玩謝你。暫時市場上的即市不乏機會，今日融創（1918）朝早敢衝，下午已派彩，最緊要肯食糊，密食當三番。

市場上貴到嘔嘅股票多的是，平嘢就升一隻少一隻。新百貨（825）之前獲新世界提私有化，順客隆（974）又被全購，皆因百貨零售股估值太殘，個別案例甚至拆散資產套現，都貴過公司市值多多聲。百盛集團（3368）嚿年以連同債項作價23.2億人民幣，賣出北京朝陽區物業，收返19億人仔，淨賺9億人民幣，套現所得已經係市值六七成。只要百盛願意執多幾間舖、賣埋啲物業，就能夠釋放更多價值。

百盛近期執舖進度，正合市場胃口，其中北京百盛執吓執吓剩返一間復興店，為咗等大批coupon畀客戶有機會用，所以執剩一間基本上已經不能再執。百盛唔少部分百貨店以自有物業經營，呢啲物業賣出去就相當值錢，同時執舖等同止蝕，令賬目改善，一舉兩得。百盛未來只要做最簡單的事，就係繼續賣舖，股價就會升，呢啲easy basket，無理由唔做落去。

晉佳

掌握財經生活資訊，即Like「蘋果ATM」fb專頁啦！
http://fb.com/appledailyatm