如果你同老婆或者女朋友講，話公司有應酬今晚陪唔到佢，點知俾佢撞破你原來去咗打通宵麻雀，仲要一家輸三家，你估你幾時先可以有運行？
味千（538）上星期急急腳為湯底事件解畫，仲拎埋農業大學個報告出嚟以正視聽，點知轉頭農大就跳出嚟否認有幫味千做研究。唔單止咁，味千之後仲被踢爆，因為麪條加咗添加劑，結果俾上海政府罰咗79萬人仔！最離譜係公司由頭到尾都冇提過呢件事，到件事噚日揚開咗，先至出通告認衰；而唐牛重複又重複咁睇份通告，都搵唔到佢哋同農大嘅羅生門事件最新進展。
一間成功嘅公司，其中一樣最重要嘅資產就係誠信，而食品安全又係老百姓最關心嘅課題，家味千一次過踩中兩個地雷，後果可以好嚴重。味千噚日跌咗12%，但唐牛唔會再叫戰友撈底博反彈，因為事情已經變咗質，高質素內需概念股通街都係，犯不着向虎山行囉！
唐牛