國際賽後賽期密密麻麻，賽事太多開始出現唔夠馬報名的情況，剛周日（16日）已經有多組出現冷場，今天（17日）進行星期日（23日）沙田賽事報名，亦因報名馬唔夠數要延遲。

泥地賽事一向編排唔算多，周三（19日）泥地夜賽亦非全部出馬滿額，較有睇頭的是兩組四班1200米。

第四場四班1200米，霍利時馬房「頌友」泥地性能毋須多講，九歲馬居四班依然夠惡，唔好睇小。

「頌友」在泥地四班1200米曾七捷，加上贏過一次谷草，累積八Win拍住同場其他馬勝出總和，九歲馬當然唔可以同全盛時比較，惟本身被保養得宜，依然仲有兩腳。

上場「頌友」落番四班跑同程，鞍上人郭能非常論盡，轉彎時望空唔上唔落，腳程蝕了不少，但入到直路餘勢仍強，縱然輸五個多馬位，表現仍算不錯。

今季「頌友」於三班起步，寓賽於操，跑完四場後狀態已經到位。上季尾由黃俊策騎取勝，此子近期騎功有進，留放均相當淡定，減七磅相當着數，加上今場排第1檔起步，對手唔算強，九歲老馬可趁亂重開勝門。