馬浚偉、胡定欣、姜大衛、馮素波、李龍基、黃澤鋒、林敬剛等今日喺深水埗出席舞台劇《偶然‧徐志摩》演員見面會，抗癌歌手李明蔚亦有現身支持。

定欣喺舞台劇中，將有兩分鐘嘅水䄂舞表演，佢話：「我喺會所一間房裡面練習，每日練兩個鐘，好似孤軍作戰，不過都好享受，一個人靜靜哋。」定欣表示已愛上水䄂舞同崑曲，就算將來完成演出，佢都會繼續喺呢方面鑽研，馬仔大讚定欣：「上星期排，佢已經將成隻舞跳咗出嚟，佢成日話大壓力，但佢已經排好晒，所以我唔理佢。」定欣認為對自己嘅要求必須要專業。問定欣係咪練舞練到瘦咗？佢話：「呢個運動量都幾大，畢竟係3米長嘅水䄂。」但馬仔覺得定欣肥番少少cute好多。

講到定欣有份演出嘅新片《逆流大叔》入圍下個月喺美國紐約舉行嘅《紐約亞洲電影節》主競賽單元，定欣好開心咁話：「呢部係我第一部電影，收到呢個消息，好開心，部戲8月上，所以呢個暑假好充實，除咗宣傳部戲，仲有宣傳《宮心計2深宮計》同演出呢套舞台劇。」

精選娛聞，喺晒《娛果》
http://fb.com/appledailyent