原來掛街板位置並非面向馬路加惠臺大門,而係面向行人路,前面圍欄對落係個露天停車場,對出就係卑路乍灣海面。陳淑莊話畀呢個位佢掛街板十分離奇,事關呢條行人路平時冇乜人煙,對面馬路行人只係見到街板背面,咁搞法真係坐船嘅人先會睇到塊街板,仲要用望遠鏡先睇到,可憐街板被迫守海皮,真凄凉。
政府之前話即使保皇黨唔拆街板,都有人流多旺區位置畀候選人做宣傳,點知原來係吹水,是但求其搵啲位就交差,陳淑莊直斥政府用揦鮓招,「呢啲就係代表政府打壓補選嘅手段囉!」佢話當局畀咗大約300個街板位佢,由於部份實在太偏僻,掛上街板可能得烏蠅睇到,因此佢只在200個位掛街板,肯定影響選舉宣傳。