印象中爸爸嘅形象係比較嚴肅，喺表達情感方面亦好含蓄，不過，上個星期，大使同一班單親爸爸、同佢哋嘅仔女共二十幾人，一齊去蘋果基金資助舉辦嘅大埔沙螺洞生態之旅，大使見到呢班爸爸除咗同仔女玩得好開心之外，當中重有唔少溫馨場面，相信喺仔女心入面佢哋真係一個絕世好爸！

爸爸細心關懷
大使曾經同friend行過沙螺洞，知道呢段路雖然係平路，但當中有唔少崎嶇不平嘅碎石、泥濘，一個唔小心隨時會跣低。所以喺嗰日行程中，好多爸爸成日叫住啲仔女要小心，見到仔女行到滿頭大汗時，爸爸就即刻遞條毛巾同埋冰凍飲品畀佢哋解渴；路途上，爸爸重教吓仔女愛護大自然、做人嘅道理。
經過兩個幾鐘頭山路，大家終於可以休息食晏，之後，大會安排咗親子故事比賽，有啲爸爸見到自己個仔咁勇敢企出嚟講故事，不禁眼泛淚光有啲感觸；囡囡就要拖住爸爸一齊講故事；重有個細路講講吓唔記得內容，突然喊出嚟，爸爸遞上紙巾之後，就喺台下鼓勵囝囝繼續講落去。