小C之家人上星期患病,咳嗽與發燒齊來,於是去公立醫院睇門診,𠵱家公立醫院嚴防大陸流感傳入香港,守龍門守得好緊,一見小C之家人又咳又發燒,立即送咗佢入醫院嘅隔離病房。小C與家人一時之間,措手不及,不知如何是好。次日,小C去探病,被拒入內,只好打電話,聽到家人(老人家)幾徬徨喎,小C於是向表姐請教有乜辦法。表姐諗起沙士時期嘅視像電話,於是佢叫試吓。唉吔,一問之下,要「卜」期,等足三日。到咗呢個時候,就諗起個世界上有3G電話呢回事,3G就係與隔離病房內嘅病人溝通嘅最好夥伴。
麻煩就係,老人家唔識新玩意,透過醫護人員送3G入到去病房,老人家都未必識用。小C表姐話:「睇怕母親節之最佳禮物就係送部3G機畀阿媽,教曉佢如何用機,平時可以打電話返屋企睇吓佢,萬一有事起嚟,就可以有更好用途。」
呢個主意幾好,啲老公收到老婆送嘅3G,不如轉送畀家中父母,以備不時之需。