長和（001）主席李嘉誠李嘉誠今日喺業績發佈會宣佈退休，消息傳出後，成為城中嘅熱門話題！查實李嘉誠嘅生意版圖認真遼闊，基本上衣食住行都會常在你左右，唔少電影亦會搵李嘉誠嘅慳儉作風做題材，甚至1996年大仔李澤鉅被有「大富豪」之稱嘅犯罪集團首腦張子強綁架，事跡亦被翻拍成電影。

《轟天綁架大富豪》、《驚天大賊王》、《樹大招風》
呢兩套戲當年係根據綁架事件而改篇，《轟天》由呂良偉、于榮光同葉童主演的影片，《驚天大賊王》則由任達華、譚耀文、吴廷燁、姚樂怡同曹永廉等人演出，事隔多年，《樹大》就搵咗陳小春扮演張子強，將綁架情節又再搬上銀幕！

《新難兄難弟》
以節儉作風而聞名李嘉誠，喺12歲嗰年由潮州移居本港，細細個做過鐘錶修理、茶樓同埋玩具銷售員等等，之後又因為每天苦幹16小時生產膠花而賺得第一桶金。喺《新難兄難弟》裡面，梁朝偉回到過去，同仲係o靚仔嘅老竇梁家輝喺春風街做大排檔，遇到飾演李嘉誠嘅李子雄，嗰陣嘅李嘉誠仲未發跡，不過梁朝偉好熱情咁介紹自己！

《千王之王2000》
羅家英喺戲中客串扮演李嘉誠，佢同埋胡楓、曾近榮扮演城中富豪，之後俾王晶捉咗入去囚禁，跟住周星馳又喺獄中同佢哋賭錢，結果贏大錢！

精選娛聞，喺晒《娛果》
http://fb.com/appledailyent