疫情持續，除了去水渠U形隔氣有機會播毒，資深驗樓師詹濟南認為，室內外露喉管接駁位都有機會漏氣，漏得氣時播得毒。

詹Sir日前驗收新地（016）大埔白石角雲滙一個約2,000萬元單位，他即場教路施以「神之手」擢番梘泡鋪喉管駁位驗漏氣，作風硬朗的他自言「反日」，並謂：「佢神之手？我茂利棍！」雖然外露喉管無出事，但睡房牆身驚現一處闊約1呎、長約6呎的批盪空鼓，不排除打針灌漿。不過由於單位面積大，實用953方呎，且主要問題僅上述一處，令驗樓得分仍高達96分。新地發言人回應，已即時跟進所提出的項目瑕疵，並於翌日完成所有跟進工作。

《蘋果驗樓》邀請詹Sir驗收大埔白石角雲匯一個實用953方呎單位，業主去年4月以約2,000萬元買入。疫情持續，記者及攝影師進入屋苑後，需要接受體溫檢測。發展商送贈防疫包予業主，包括5個口罩、1支酒精搓手液及1包濕紙巾。甫入單位，詹Sir看見客廳與露台之間加裝一度額外隔音趟門，就發表意見：「單位對出係內街，噪音嘈極有個譜，設計多餘。」不過業主霍先生不介意這項設計，還認為打開露台門後，閂埋隔音趟門，既可隔音，也可通風。

霍先生最擔心漏水，詹Sir檢驗兩個廁所及廚房，來去水喉都沒有漏水，但疫情持續，業主始終擔心喉管會否漏氣播毒，詹Sir回應：「放心。呢個單位排水設計，多咗分支喉，只要維持用返洗手盆，就會倒水落隔氣，最怕你連洗手盆都唔用。」但兩個廁所都有瑕疵，客廁坐廁輕微搖，可攝「戒指」調校至平衡，玻璃浴屏起「雞粒」，但只有幾粒，未去到更換準則，即每平方米25粒。主人廁所坐廁底螺絲無扭實，相信工人冒失，「問題雖小，處理亦簡單位，但一旦外出旅行後就滴吓滴吓，不過相信地台去水去得切。」

走到工人房廁所，他一邊摸住外露去水喉，一邊說：「最近好多人擔心呢條喉，呢條係坐廁氣喉。曾經有人改動坐廁，無封實條氣喉，結果漏氣，好似上次青衣康美樓事件，導致有人感染。過往都係駁口位漏氣，而家睇到呢條喉用咗膠水封實。」為求穩陣，業主都想Sir驗吓，求個安心。詹Sir即場教路，說要用番梘泡鋪於喉管駁位，如果喉管駁位有明顯波仔吹出，就是漏氣。詹Sir隨即擢番梘泡，猶如日本前AV男優加藤鷹「神之手」，詹Sir表明「反日」，「唔知乜嘢神之手，但唔好將我同日本人比較……佢哋到而家仲欠中國人一個道歉！」他補充：「我係陸小鳳絕招『靈犀一指』。講真條架仔好核突。」經測試後，喉管沒有漏氣。

不過單位最大問題是牆身批盪，詹Sir發現細房有一處寬約1呎、長約6呎的批盪空鼓，他以金屬探測器檢查牆身，並謂：「有時有鐵網係入面，敲到空鼓係正常，所以用呢個儀器驗吓。但呢幅係石屎牆，唔應該有鐵網，所以應該係空鼓。撲咗咁大幅，多數會裂。而家堅係空鼓！」他建議業主要求發展商鏟底重鋪或打針灌漿。雖然空鼓面積大，但全屋僅此處，其他瑕疵少，單位得96分，詹Sir解釋：「其他問題瑣碎，扣不到太多分，主要扣分就是空鼓，由於單位大，系數有別於細單位，所以得出呢個分數。」

業主霍生滿意單位質素，不過目前疫情樓市，他表示：「唔驚嘅，你唔會知樓價係幾時最高、幾時最低。個個都覺得現時厲害過沙士好多，亦都有人講如果再有沙士，一定要買樓。我睇近期樓價係有跌，但無跌得咁厲害，唔會一跌就跌到好瘋狂嘅價錢。」市場消息，雲滙新近租賃成交，如3座中層A3室，實用面積381方呎，一房間隔，以1.35萬元租出，呎租35.4元，原業主2019年以715萬元購入單位，租金回報率僅約2.3厘。

新地發言人回應，上述單位已即時派員跟進，並於本周二完成所有跟進工作，現已通知業主可到單位驗收。

記者：陳家雄

影片
採訪：陳家雄、張嘉鎣
編撰、旁白：張嘉鎣
攝影：細釗
剪接、後期：明山鳥
編審：楊智佳