連埋上周中歐聯分組賽輕取祖雲達斯，巴塞隆拿開季五連勝，美斯同蘇亞雷斯心情靚，就算西甲周中開快車，亦抽時間帶埋愛妻去睇演唱會，一行四人坐喺台下，分分鐘仲星過台上嗰位歌星。

美斯同阿蘇感情極好，今夏休季期間就一齊帶埋另一半去旅行，而行程中仲有法比加斯兩公婆。法比仔家陣遠在倫敦，就冇得join埋佢兩個去玩，而喺啱啱過咗嘅禮拜日，兩人就帶埋老婆一齊去睇哥倫比亞歌星Maluma嘅演唱會，之後仲去後台影相。據聞Maluma都好識做，演唱其中一首歌時著上巴塞波衫，仲喺ig有上載呢張相。

巴塞周二將會主場迎戰伊巴，而美斯同阿蘇喺上輪反勝基達菲一戰都冇入球，入波嘅係丹尼斯蘇亞雷斯同荷西保連奴。