滙控（005）業績唔掂，全球員工薪酬話凍又唔凍，管理層難辭其咎，難怪連離開咗獅子行6年，一向謙謙君子嘅滙豐前亞太區企業傳訊部主管賀迪文（David Hall），都罕有地撰寫網誌，以《滙控能否重現昔日光輝？》為題，批評近期集團連串事件，反映內裏有好多深層次結構問題。
年過60嘅David筆力依然，佢喺新設網誌mostlyhongkong.wordpress.com撰文，直率評彈，造成今次凍薪風波嘅集團常務總監兼人力資源主管高沛賢，雖然係行政總裁歐智華親密戰友，但本身冇人力資源背景或經驗，董事會應檢視內部晉升同選賢任能嘅標準。
對於業績差，David認為，主要股東、投資者以至監管機構，施壓撤換主席或行政總裁，改由外聘專才接掌嘅訴求會越來越大，由滙豐人掌舵大班席位嘅傳統將要改變。

欠發展願景

長話短說，David對昔日東家嘅結論係，儘管集團屢次公佈節省成本策略，但「尚欠股東一個清晰發展願景……滙控將可能永遠不會重現昔日光輝！」
David早於1998年加入滙豐銀行，一做12年，先後與3位滙豐主席（包括施德論、艾爾敦同鄭海泉）同5位行政總裁共事。
佢2010年離開滙豐後，過住半退休生活，遊山玩水，中間曾出任政治公關機構──安可顧問（Apco）高級顧問等兼職工作，佢最近表示完全退役，設立網誌，投身寫作。
華華認識嘅David，總係話到口邊留三分，今次寫Blog咁豁達，仲要評論滙豐，莫非愛之心責之切？定係哀莫大於心死地步？

賀迪文David Hall小檔案

‧1994-1997年　渣打銀行東北亞地區企業傳訊部主管
‧1998-2010年　滙豐銀行亞太區企業傳訊部主管
‧2011-2012年　安可公關顧問公司高級顧問

李華華
mailto:[email protected]