喂呀，又話捉精靈熱潮減退嘅，費清噚日放假諗住趁踏入鬼月去尖沙咀同中上環捉精靈，點知去到九龍公園、K11、海港城，一樣人頭湧湧喎。睇怕啲生意人都覺得仲有油水，所以繼續抽。

AEON即日至17日會喺店內撒花放置Lure誘餌，顧客成功喺同一日內喺AEON STYLE、AEON STORE、AEON SUPERMARKET內捉到任何3隻小精靈，影張相，然後上載於AEON Stores Hong Kong Facebook page留言位置上，再喺顧客服務台出示，就可以換到$5現金劵。

實惠就今明兩日喺指定分店大撒櫻花，等大家去捉精靈，如果捉到手機冇曬電，可以用優惠價$40換原價$99嘅尿袋，但就要喺家品部有任何消費。指定分店包括銅鑼灣怡和街、九龍灣Megabox、沙田希爾頓中心、青衣城、荃灣廣場、荃灣愉景新城。

咁究竟要抽到何時何日先乾塘？其實呢啲唔使所謂「遊戲專家」預測啦，而家玩得開心咪得囉，玩到悶咪唔玩囉。（真係咩都有專家．．．）

費清＃要生計，也要生活＃毋忘初衷